Гэйтвэй Карьер Консалтинг ХХК-ийн нэрэмжит “ШИЛДЭГ ОЮУТАН-2024” тэтгэлэг хоёр дахь жилдээ зохион байгуулагдаж, төгсөх дамжааны оюутнуудаас 2024-2025 оны хичээлийн жилд амжилттай суралцаж, эрдэм шинжилгээ, судалгаа, урлаг, спортын тэмцээнд амжилт гаргасан сувилахуйн IV дамжааны оюутан Н.Нарангэрэл, Ш.Ариунсайхан, У.Уранцэцэг, З.Дөлгөөн, Э.Тунгалагтуул, эх барихуйн IV дамжааны оюутан Х.Азжаргал, Б.Мөнхжаргал, сувилахуйн дэд бакалаврын III дамжааны оюутан Б.Заяажаргал, Ц.Загарзүсэм, эм найруулагчийн III дамжааны оюутан Г.Алтанболор нарт тус бүр 1 сая төгрөгийн мөнгөн урамшууллын батламж гардууллаа.
Энэхүү тэтгэлэг нь оюутнуудыг эмнэл зүйн орчинд ур чадвар эзэмших, төгсөлтийн өмнөх үйлдвэрлэлийн дадлагаа амжилттай гүйцэтгэхэд нь дэмжлэг үзүүлэх зорилготой бөгөөд улмаар сувилахуйн салбарын хүний нөөцийг чадавхжуулах, шилдэг оюутан залуусын сурах хүсэл сонирхлыг дэмжих, сувилагч мэргэжлийн нэр хүнд, үнэ цэнийг нийгэм, олон нийтийн дунд нэмэгдүүлэх, таниулах зорилготой билээ.
“ШИЛДЭГ ОЮУТАН” тэтгэлэг гардуулах үйл ажиллагааны үеэр Гэйтвэй Карьер Консалтинг ХХК-г “2024 ОНЫ ШИЛДЭГ ХАМТРАГЧ БАЙГУУЛЛАГА”-аар өргөмжилж, Гүйцэтгэх захирал Э.Хатантуулд Анагаахын шинжлэх ухааны үндэсний их сургуулийн Дархан-Уул аймаг дахь салбар Анагаах ухааны сургуулийн хөгжил, дэвшилд оруулж буй хувь нэмрийг нь үнэлэн “Эрдмийн Од” медалиар шагналаа.
Тэтгэлэг гардуулах үйл ажиллагаанд Гэйтвэй Карьер Консалтинг ХХК-ын гүйцэтгэх захирал Э.Хатантуул, мэргэжилтэн Т.Улсболд, герман хэлний багш Маттиас болон ХБНГУ-д сувилагч мэргэжлээрээ ажиллаж, амьдарч байгаа 2017 оны төгсөгч Э.Мөнхтуул, “Шилдэг оюутан-2023” тэтгэлгийг хүртсэн, Дархан-Уул аймгийн Эрүүл мэндийн газрын мэргэжилтэн, 2024 оны төгсөгч Б.Эрдэнэбилэг нар оролцлоо.
Оюутнуудын амжилттай суралцахуйг дэмжин, эмнэл зүйн дадлага гүйцэтгэхэд бодит дэмжлэг үзүүлсэн Гэйтвэй Карьер Консалтинг ХХК-ны хамт олондоо сургуулийн нийт багш, оюутнуудынхаа өмнөөс талархал илэрхийлж, ирж буй 2025 ондоо амжилт бүтээлээр дүүрэн байхын ерөөл дэвшүүлье.
