Анагаахын шинжлэх ухааны их сургуулийн хэмжээнд Боловсрол, Шинжлэх ухааны сайдын 2024 оны 147 дугаар тушаалаар батлагдсан "Сургалтын хөтөлбөрт тавих нийтлэг шаардлага"-ын дагуу сургалтын хөтөлбөрийн өөрчлөлт, төлөвлөгөөг шинэчлэх ажлын хэсгүүд байгуулагдан ажиллаж байна.
Дархан-Уул аймаг дахь салбар Анагаах ухааны сургуульд хэрэгжиж байгаа бакалавр, дэд бакалаврын сургалтын хөтөлбөрийн өөрчлөлт, шинэчлэлийн хүрээнд нийт багш нарын дунд “СУРГАЛТЫН ХӨТӨЛБӨРИЙН ШИНЭЧЛЭЛ” хэлэлцүүлгийг 2025 оны 04 дүгээр сарын 01-ны өдөр зохион байгууллаа.
Тус хэлэлцүүлгийн эхэнд Дархан-Уул аймаг дахь салбар Анагаах ухааны сургуулийг хөгжүүлэх “Стратеги төлөвлөгөө-2023” бодлогын баримт бичиг, түүний гүйцэтгэл сэдвээр сургуулийн захирал, анагаах ухааны доктор, дэд профессор Б.Баясгаланмөнх, Сургалтын хөтөлбөрт тавигдах нийтлэг шаардлага, сургалтын хөтөлбөрийн магадлан итгэмжлэл, зөвлөмж сэдвээр сургалтын албаны дарга Б.Хандаа, Төгсөгчдийн мөшгөх судалгааны үр дүнгээс сэдвээр сургалтын албаны арга зүйч Ү.Галбат, эх барихуйн хөтөлбөрийн шинэчлэл сэдвээр эмнэл зүйн тэнхимийн эрхлэгч П.Дуламжав, сувилахуйн хөтөлбөрийн шинэчлэл сэдвээр сувилахуйн тэнхимийн эрхлэгч Л.Отгонтөгс, эм найруулагч, эм зүйч хөтөлбөрийн шинэчлэл сэдвээр эм зүйн тэнхимийн багш Б.Хулан, Лабораторийн техникч хөтөлбөрийн шинэчлэл сэдвээр анагаахын суурь боловсролын тэнхимийн эрхлэгч, доктор, дэд профессор Б.Мэндхүү нар илтгэл танилцуулав.
Хэлэлцүүлэгт мэргэжлийн 6 тэнхимийн 45 багш оролцож эрүүл мэндийн тусламж үйлчилгээний эрэлт хэрэгцээ, сургалтын хөтөлбөрийн шинэчлэл, мэргэжилтний цогц чадамж, салбар, бүрэлдэхүүн сургуулиудын мэргэжлийн багш нарын хамтын ажиллагаа, сургалтын төлөвлөгөөний агуулгын багтаамж, залгамж холбоо, сургалтын үйл ажиллагааны зохион байгуулалт, сургалтын материаллаг орчин, багш нарын ажлын ачааллын талаар санал бодлоо илэрхийлсэн үр өгөөжтэй үйл ажиллагаа зохион байгуулагдлаа.
Хэлэлцүүлэгт оролцсон эрдэмтэн багш нартаа талархал илэрхийлье.
“ЭВ-ЭЕ БИДНИЙ СОЁЛ”
