АШУҮИС-ийн Дархан-Уул аймаг салбар АУС-ийн эм зүйн тэнхимээс жил бүр уламжлал болгон эм найруулагч хөтөлбөрөөр суралцагч оюутнуудын мэргэжил сурталчлах нээлттэй хаалганы өдөрлөгийн үйл ажиллагааг зохион байгууллаа. Энэхүү өдөрлөгийг Эм найруулагч мэргэжлийн онцлогийг таниулах, үнэ цэнийг мэдрүүлэх, бахархан түгээх зорилгоор жил бүр өөр өөрийн онцлогтойгоор зохион байгуулдаг юм. Энэ жилийн хувьд Эм найруулагчдын өдрийг тохиолдуулан 2024 оны 10 сарын 17-ны өдөр амжилттай зохион байгууллаа. АНУ-д 1991 оны 10-р сарын 3 дахь 7 хоногийг “Үндэсний эм найруулагчдын өдрүүд” хэмээн хэвлэлийн хуудаснаа нийтлэл гаргаснаар эдүгээ бидний бахархам мэргэжлийн тэмдэглэлт өдрүүд ОУ-ын эм найруулагчдын 7 хоног гэж албан ёсоор тэмдэглэгдэж эхэлсэн байна. Тус арга хэмжээг АШУҮИС-ийн Дархан-Уул аймаг салбар Анагаах Ухааны Сургуулийн захирал, доктор, дэд профессор Б.Баясгаланмөнх нээж үг хэллээ. Мөн ахмад багш клиникийн профессор, тэргүүлэх зэргийн эм зүйч Х.Оюунбаяр “Дархан АУС - Эм зүйн тэнхимийн түүх” илтгэлийг өдөрлөгт хүрэлцэн ирсэн багш, оюутнуудад танилцуулав. Өдөрлөгийн үеэр эм найруулагчийн 1-3 дамжааны оюутнуудад Миний мэргэжил-Эм найруулагч сэдвийн хүрээнд ахлах багш Д.Мөнх-Эрдэнэ /БС-ын доктор, тэргүүлэх зэргийн эм зүйч/ Мэргэжлийн зорилго, алсын хараа, үнэт зүйл, зарчмын талаар, багш Б.Хулан “Мэргэжилтний мэргэжлийн сэтгэл зүй”, дадлагажигч багш Х.Өлзийжаргал “Миний мэргэжил ирээдүйд” гэсэн сэдвүүдээр сонирхолтой илтгэлүүд танилцуулав.
Өдөрлөгийн үеэр Эм найруулагчийн 1,2,3-р дамжааны оюутнууд амин дэмт жимсний цэвэр шүүс, Дархлаа дэмжих цай, Хүчилтөрөгчийн коктейл зэрэг эрүүл мэндэд ач тустай бүтээгдэхүүнүүдээр сургуулийнхаа багш, оюутнууддаа үйлчиллээ. Эм найруулагчийн 3-р дамжааны оюутнууд зуны хээрийн дадлагаар түүсэн эмийн ургамлын хатаамалыг шинэ технологи ашиглан үзүүлэн болон бэлэг дурсгалын хэлбэрээр хийсэн бүтээлүүдээ танилцуулсан нь өвөрмөц байлаа.
Нийт оюутнууддаа сурлагын өндөр амжилтыг хүсэн ерөөе.
